Kiribile elkartea sortu dute Sopelan, herrian Eraztun Berdea bultzatzeko xedez

Kiribile elkartearen helburu nagusia da Sopelako ondare natural, kultural eta historikoa babestea.

Sopelako ondare natural, historiko eta kulturala babesteko helburuagaz sortutako elkartea da Kiribile. Azaldu dutenez, Eraztun Berdea sortu gura dute, erakundeen eta herritarren parteartzeagaz adostutako akordio estrategiko baten bidez.

Ingurumenagaz lotutako interes komunak dituen sopeloztar talde batek Kiribile elkartea aurkeztu du. Sopelako ingurune naturala zaintzeko beharragaz arduratuta, eta ondare natural, historiko eta kulturala kontserbatu eta hobetzeko helburuagaz sortutako elkartea da. "Helburu nagusia herritarrek ondare hori ezagutu eta gozatzea", dela azpimarratu dute.

Beraien ustez, helburu horiek gauzatzeko modurik egokiena Sopelaren perimetro naturalaren barruan Eraztun Berdea ezartzea izango litzateke. "Gure aberastasun natural, historiko eta kulturalaren elementu garrantzitsuenak jasotzeko erreferente gisa", azaldu dute.

Zehaztu dutenez, Kiribile elkarteak izaera proposatzailea du, eta, horregatik, Sopelako eragile instituzional, politiko eta sozialakaz bilerak egiten hasiak dira, proiektuaren ildo nagusiak zuzenean partekatzeko.

Izaerari dagokionez, Kiribile elkartean naturarekiko grina partekatzen duten herritar talde batek osatzen duela diote. Gaineratu dutenez, "zabalik daude  antzeko interesak dituzten herritar guztientzat", eta jakitun dira helburuak betetzeko beharrezkoa izango zaiela erakunde eta herritar guztiakaz lankidetzan aritzea.

Sopelako Eraztun Berdea

Azaldu dutenez, Sopelako Eraztun Berdearen ideia erakundeen eta herritarren artean adostutako akordio estrategiko batetik abiatuko litzateke. Hori definitzeko, "elkarlaneko kultura erabili beharko litzateke". Horren helburu nagusiak honako hauek dira: alde batetik, Sopelako natura-guneak eta biodibertsitatea babestea eta hobetzea, eta, bestetik, udalerriko komunitate osoak naturarekiko duen gozamena eta errespetua, "modu kontziente iraunkor eta arduratsuan sustatzea".

Eraztun Berdea honako oinarri hauek izango lituzkeela zehaztu dute: babes naturaleko perimetro bat ezartzea, zuhaitz autoktonoentzako eremuak berreskuratzea, herriko ondare historiko eta kulturala babestea eta biodibertsitatea kontserbatzeko urratsak ematea.

Garai latzak dira. Ia egun batetik bestera gure bizimoduak hankaz gora jarri ditu birus batek, eta kolokan daude gauza asko. Hedabideontzat ere ez dira garai gozoak, noiz eta gure lanaren beharra inoiz baino agerikoagoa denean. Horregatik, zure laguntza materiala ere behar dugu aurrera jarraitzeko.

Honenbestez, HIRUKAlagun egitera animatzen zaitugu, urtean 35 euroko ekarpena eginda, edo gure 5. urteurrena dela eta martxan ipini dugun Eman Bostekoa HIRUKAri kanpainan parte hartzera (bost euroko ekarpena eskatuko dizugu). Horretarako, jarri gugaz harremanetan administrazioa@hiruka.eus helbidera mezu bat idatziz.


Izan zaitez HIRUKAlagun