Sopelako Udalak jakinarazi duenez, "Aktibate Klik Sopela 2021" bonu-kanpainara atxikitzeko epea zabaldu du. 2021eko azaroaren 30etik abenduaren 9ra arte, interesa duten merkataritza-, ostalaritza- eta zerbitzu establezimenduek bonu-kanpaina honetan parte hartzeko eskaera egin ahal izango dute. Horretan izena emateko udal-webgunean gaitutako plataforma elektronikoa baliatu beharko dute.
Tokiko kontsumoa sustatzeko helburua duen kanpaina honetan bonu mota bi izango dira: alde batetik, 15+5 bonuak 15 euroko prezioa izango du eta aparteko 5 eurogaz gutxienez 20 euroko erosketak egin daitezke; bestetik, 30+10eko bonuak, 30 euroko prezioagaz 10 euroko hobaria lortzen da, gutxienez 40 euroko erosketetarako.
Bonu horiek abenduaren 17tik 2022ko otsailaren 28ra arte erosi ahalko dira, Kutxabank-eko sarreren salmenta- eta bilketa-terminaletan edo Sopelako Udalak bere webgunean gaitutako plataformaren bitartez. Atxikitako establezimenduek gehienez bonu bi onartuko dituzte faktura bakoitzeko, eta erabilitako bonuen zenbatekoa erosketan agortu beharko dela zehaztu dute udal-iturriek.
Tokiko merkataritzari laguntza
Sopelako Udaleko Enplegu eta Sustapen Ekonomikoko zinegotzi Teresa Fernandezek azpimarratu duenez, "garrantzitsua da Sopelako tokiko merkatarientzako ekonomikoki hain zaila den une honetan laguntza ematea"; horregatik, establezimenduei zein bezero potentzialei parte hartzeko deia egin die: "Gure udalerrian bilatzen den edozein produktu edo zerbitzu aurki baitaiteke".