Sopelako hirigunea zeharkatzen duen metroa lurperatzeko bideragarritasun-azterketa eskatu dute

Sugurdialde kaleko panel akustikoak.

Sopelako Udaleko oposizioko talde politikoek eta Sopelako Auzo Elkarteko kideek alegazioak aurkeztu dizkiote Bizkaiko Garraio Partzuergoaren Bilboko Hiri Trenbidearen Zarata eta Bibrazioen Kontrako 2021-2024 ekintza-planari. Eskatu dute Sugurdialde kaleko zarata-arazoak etetea eta Sopelako hirigunea zeharkatzen duen metroaren ibilbidea lurperatzeko bideragarritasun-azterketa egitea.

 

Sopelako Auzo Elkarteak eta Sopelako Udaleko oposizioko taldeek, EH Bilduk, Elkarrekin Podemosek, DB-TUk eta Podemosetik kanporatua izan zen zinegotzi atxiki gabeak, gutun bat bidali zioten Gorka Ugalde Bizkaiko Garraio Partzuergoaren presidenteari, abenduaren 20an. Bertan, Bilboko Hiri Trenbidearen Zarata eta Bibrazioen Kontrako 2021-2024 ekintza-planari alegazioak aurkeztu zizkioten.

Gutunean, Bizkaiko Garraio Partzuergoari eskatu zioten Sugurdialde kaleko bihurguneko 1. eta 2. bideetan langa txiki eta xurgatzaileak jartzea, egun instalatuta dauden panel akustikoak lau metroko altueratik bi metrora murriztea eta hori gauzatzeko behar adinako zenbatekoa izango duen partida jasotzea aipatutako ekintza-planean.

Horretaz gain, epe laburrean Sopela zeharkatzen duen metroa lurperatzeko bideragarritasun-azterketa bat egiteko ere eskatu diote Bizkaiko Garraio Partzuergoari.

Gaineratu dutenez, espero dute CTB zerbitzu publikoko erakundea izanik, bere sentsibilitatea adieraziko duela eta beraien eskaerei erantzungo diela: "Lau metroko pantailek Sugurudialde eta Etxebarri inguruko bizilagunei eragiten dizkieten arazo larriak behin betiko konpontzea, eta gure udalerrirako hain beharrezkoa den metroa lurperatzeko aukera aztertuko dutela".

Irakurle agurgarria:

Garai latzak dira. Ia egun batetik bestera gure bizimoduak hankaz gora jarri ditu birus batek, eta kolokan daude gauza asko. Hedabideontzat ere ez dira garai gozoak, noiz eta gure lanaren beharra inoiz baino agerikoagoa denean. Horregatik, zure laguntza materiala ere behar dugu aurrera jarraitzeko.

Honenbestez, HIRUKAlagun egitera animatzen zaitugu, urtean 35 euroko ekarpena eginda. Horretarako, jarri gugaz harremanetan administrazioa@hiruka.eus helbidera mezu bat idatziz edo beheko botoiari sakatuz.


Izan zaitez HIRUKAlagun