Lemotza ibaiak Iberre aldean jasandako isurketaren jatorria identifikatu eta geldiarazi dute

Lemotza ibaia, kutsatuta. © SOPELAKO UDALA

Iberre inguruan, Lemotza ibaira isurtzen ari ziren kutsatzaileak identifikatu eta horiek geldiaraztea lortu dute Sopelako udal-brigadako agenteek eta URA-Uraren Euskal Agentziako teknikariek. Arazoaren sorburua, azaldu dutenez, eraikuntza lanetan ari zen Loiola sarbideko lursail batean zegoen.

Sopelako udal brigadako agenteen eta URA – Uraren Euskal Agentziako teknikarien ikuskaritza-lanak Lemotza ibaira, Iberre inguruan, isurtzen ziren isurketa kutsatzaileakaz amaitzea lortu du. 

Arazoaren sorburua, ikuskatzaileek zehaztu ahal izan zutenez, eraikuntza lanetan ari zen Loiola sarbideko lursail batean zegoen, zuzenean ibaira husten ari zena. Enkofratze-obra bat da, non zimenduak jartzeko erabilitako material likidoa azalera ateratzen zen, euri-uren sarean eroriz eta ibaia kutsatuz. 

Sopelako Udalak eta URAk egoera horren berri eman zieten obraren arduradunei, eremu horretako isuri kutsatzaileakaz amaitzeko neurri egokiak har zitzaten. 

Sarearen luzerak asko zaildu zuen igorpen kutsatzaileek eragiten zituzten puntu zehatzak detektatzea. Horregatik, URAko eta Udaleko teknikariek elkarregaz lan egin dute, puntu zehatza identifikatu ahal izan zuten arte. “Kutxatilak altxatu ziren brigadetako langileekin, eta pixkanaka lekua zedarritu zen, azkenean sorburura iritsi arte. URAri eta enpresari jakinarazi zaie ur zikin gehiago isur ez dezaten”, adierazi dute udal-iturriek. 

Egun gutxi barru ibaia normaltasunera itzuliko dela espero du Udalak: "Helburu nagusia isurketaren jatorria identifikatzea eta amaitzea zen, eta lan erraza izan ez bada ere, lortu dugu".

Irakurle agurgarria:

Garai latzak dira. Ia egun batetik bestera gure bizimoduak hankaz gora jarri ditu birus batek, eta kolokan daude gauza asko. Hedabideontzat ere ez dira garai gozoak, noiz eta gure lanaren beharra inoiz baino agerikoagoa denean. Horregatik, zure laguntza materiala ere behar dugu aurrera jarraitzeko.

Honenbestez, HIRUKAlagun egitera animatzen zaitugu, urtean 35 euroko ekarpena eginda. Horretarako, jarri gugaz harremanetan administrazioa@hiruka.eus helbidera mezu bat idatziz edo beheko botoiari sakatuz.


Izan zaitez HIRUKAlagun