Zapatuan, urriaren 29an, Desazkundearen Nazioarteko Eguna izan zen, hori dela eta, barikuan, Ander Deuna Ikastolako 3. DBHko ikasleek horren inguruko erakusketa egin zuten Sopelako udaletxeko plazan. Sabin Ibazeta irakasleak azaldu duenez, "STEAM proiektu batean sartuta gaude, eta desazkundea da gure lanaren ardatza, horregatik, herritarrei horren berri eman nahi genien".
Ekimen horren helburua "ikasleak jasangarritasun ekologikoa eta soziala ardatz duten balioetan heztea da", azaldu du Ibazetak. Gaineratu duenez, ekimen horregaz, ikastolatik ateratzen diren ikasleak "bizi dugun egoeraz kritikoak eta kontzienteak izatea nahi dugu; etorkizunean, justuagoa, adeitsuagoa eta solidarioagoa den mundu baten alde egin dezaten".
Panel batzuen bitartez, ikasleek bertaratu ziren herritarrei desazkundearen nondik norakoak azaldu zizkieten. Besteak beste, jakinarazi zieten politika eta ekonomia arloko mugimendu horregaz, naturaren eta gizakion artean oreka eta harreman justuagoa bilatzen dela.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun
