Kontzertu solidarioa eskainiko dute Erandio, Plentzia eta Sopelako abesbatzek barikuan

Barikuan, hiru abesbatzek egingo duten emanaldi solidarioa 20:00etan hasiko da.

Sopelako San Pedro elizan kontzertu solidarioa emateko elkartuko dira Erandioko Altzaga abesbatza, Plentziako Iraunkor abesbatza eta Sopelako Lagun Artea abesbatza. Azken horretako lehendakaria da Jose Antonio Kandina, eta azaldu duenez, "sarrera librea izango da, eta bakoitzak nahi duen ekarpena egin dezake dohaintzan emateko".

Berez, kontzertua zapatuan egingo den Fair Saturday edo zapatu solidarioa dela eta egingo dute; hala ere, Kandinak adierazi duenez, "zapatuan egitea ez da hain erraza, jende gutxiago etorriko delako, beraz, barikuan egingo dugu, ahalik eta jende gehiago etor dadin". Fair Saturday delakoaren helburua da kultur jardueren bitartez ekimen solidariotarako laguntza batzea, eta, sarrera librea izango den arren, bertaratzen direnek dohaintzak egin ahalko dituzte. "Batzen dugun dirua Sopelako Caritas erakundeari emango diogu beren proiektuetarako", azpimarratu du.

Urtez urte egiten duten duten kontzertu honetako taldeak aldatzen joan dira, eta, oraingoan, etxekoakaz batera, Plentzia eta Erandioko taldeak izango dituzte Sopelako San Pedro Elizan. Kandinak azaldu duenez, gehienbat sopeloztarrak joan ohi diren kontzertua da, baina mundu guztiari gonbidapena luzatu gura izan dio, eta aurreratu du Erandiotik gutxienez autobus bat eramango dutela eta Plentziatik ere musikazaleak hurbilduko direla.

Irakurle agurgarria:

Garai latzak dira. Ia egun batetik bestera gure bizimoduak hankaz gora jarri ditu birus batek, eta kolokan daude gauza asko. Hedabideontzat ere ez dira garai gozoak, noiz eta gure lanaren beharra inoiz baino agerikoagoa denean. Horregatik, zure laguntza materiala ere behar dugu aurrera jarraitzeko.

Honenbestez, HIRUKAlagun egitera animatzen zaitugu, urtean 35 euroko ekarpena eginda. Horretarako, jarri gugaz harremanetan administrazioa@hiruka.eus helbidera mezu bat idatziz edo beheko botoiari sakatuz.


Izan zaitez HIRUKAlagun