Olatz Vazquez 2021eko otsailaren 2an zendu zen, 27 urte zituela. 2020an, pandemia betean, minbizia diagnostikatu ziotenean, kazetariak argazkilaritzarekiko zuen pasioa erabiltzea erabaki zuen zuri-beltzean egindako autorretratuen bidez bere gaixotasunaren eta egoera emozionalaren bilakaera modu gordin baina eder batean erakusteko.
"Bizitza hiru segundo eskasetan aldatzen zaizu, mediku batek honako hiru hitz hauek esaten ematen duen denbora: 'Olatz, minbizia duzu'. Orduz geroztik, nire egunak igande eternalak dira, eta nire denbora guztia gehien gustatzen zaidanari eskain diezaioket: argazkigintzari", azaldu zuen argazkilariak bere sareetan.
Tarte horretan, sare sozialak izan ziren Minbizia izendatu zuen lanaren bozgorailua, eta bere erretratuen bitartez pairatzen ari zen gaixotasunaren errealitatea partekatu zuen. "Minbiziari buruzko hitzaldi beliko edo motibazionalak hausten ditu, bere bizipena zintzoki, intimistaz eta lotsarik gabe kontatzeko", deskribatu zuen Vazquez hil eta urtebetera bere lana argitaratu zuen Tres Hermanas argitaletxeak.
"Ez dut arnasarik edo errukirik gura. Ez dut nahi gerlari, borrokalari edo txapeldun deitzea. Ez dut orbainik estaltzen duen begiztarik nahi, ezta malkoak ezkutatzen dituen irribarrerik ere. Ez dut zentzurik gabeko besarkadarik nahi, ezta arrazoirik gabeko mezurik ere. Ez dut onginahizko begiradarik gura, ezta bideko aholkurik ere. Ez dut emotikonorik nahi ukabila goian jarrita, ezta beti indartsu ere. Ez dut nahi", idatzi zuen.
