Domekan, sare sozialetatik zabaldutako komunikatu baten bitartez, Sopelako Kuadrillek zapatuan udalerrira inauteriak ospatzera hurbildu ziren askok izan zuten jarrera salatu zuten: "Benetan lotsagarria eta tristea da gaur goizean Sopelak duen irudia: kaleak zaborrez beteta, taberna batzuetako materialak apurtuta...".
Azaldu dutenez, elkarteak antolatzen dituen jarduerak geroz eta arrakasta gehiago ari dira izaten, "horren ondorioz, geroz eta gehiago dira gure herrira hurbiltzen diren pertsonak. Dena den, atzo, otsailak 18an gertatu zena ez zuen inork espero eta kontrolaezina bilakatu zen". Gaineratu dutenez, azkenaldian eurak antolatutako jarduera jakin batzuek masifikaziorako joera hartu dute, "eta sustatu nahi dugun aisialdi eredutik asko aldendu dira".
Sopelako Kuadrillek euren erantzukizun partea onartu dute, eta iragarri dute horrelakoak ekidin aldera egoera "sakonean" aztertuko dutela, "gertatutakoa errepikatu ez dadin". Halaber, azpimarratu dute horrelakoek ez diotela herriari ezer positiborik ekartzen.
Helburu argia
Gertatutakoa gaitzesteaz gain, Sopelako Kuadrillek elkartasun osoa adierazi gura izan diete kalteak jaso dituzten guztiei, "bereziki, momentu honetan lanean ari diren garbikuntzako eta udaletxeko langileei". Halaber, gazteen elkarteko kideek euren helburua ere berretsi gura izan dute: "kuadrillen arteko harremanak sendotu, herria girotu, aisialdi eskaintza alternatibo bat planteatu eta, epe luzera, Sopela bizigarriago bat lortu".
Sopela atzo Sopela gaur. pic.twitter.com/cqKHMuY4WQ
— Barrikako Semea (@Barrikako_Semea) February 19, 2023