Hilaren 13ra bitartean, Sopelako Atxabiribil hondartzaren ondoan ikusgai dauden irudietan surf oholen teknologia, olatuak nola sortzen diren azaltzeko informazioa eta kirolaren praktikaren inguruko xehetasun zientifikoak azaltzen dira.
Erakusketa hiru irudik osatzen dute. Lehenengoan, oholen teknologia eta historian zehar izan duten garapena deskribatuta dago, zurezkoetatik material berriakaz egindakoetara emandako aldaketak modu bisualean erakutsiz. Bigarren irudian, berriz, olatuen sorreran haizeak, periodoak edota mareek daukaten eragina zehazten da, eta surf egiteko olatu egokienak zeintzuk diren deskribatuta dago. Azkenik, erakusketa osatzen duen hirugarren irudian, surfa nola egiten den azaltzen da eta, betiere ikuspegi zientifiko batetik, olatua hartu eta horren gainean mugitzeko zehaztasunak ematen dira.