Sopelako Udalak neurri zehatzak exijitu dizkio lorezaintza enpresa esleipendunari, bere zerbitzua hobetzeko

Nahia Martinez Gondra 2023ko ira. 1a, 10:37
Deskargatu Info Ahotsak :

Lorategi-eremuen kontserbazioko zerbitzuaren kontratua zorrotz bete dadila eskatu du Sopelako gobernu taldeak.

Sopelako lorategien egoera orokorrari buruz herritarrek behin eta berriz egiten dituzten kexak direla eta, udalerriko gobernu taldea, EH Bilduk eta Elkarrekin Podemosek osatuta, eta Udaleko Zerbitzu Teknikoa SAMYL SL enpresa esleipendunagaz bildu ziren abuztuaren 21ean, lorezaintzako eta lorategi-eremuen kontserbazioko zerbitzuaren kontratua zorrotz bete dadila eskatzeko. Hala, bilera horretan, gobernu taldeak berriro adierazi zuen kontratuan hitzartutako baldintza guztiak zehatz-mehatz bete behar zirela, udal-zerbitzua ahalik eta gehien optimizatzeko.

Besteak beste, honako puntu hauek zorroztasunez betetzea eskatu zuen Sopelako gobernu taldeak: 

  1. Beti aldi berean 9 pertsona lanean egotea, kontratuan adierazten den bezala.
  2. Oporrak aldi baterako langileek beteko dituzte automatikoki.
  3. Bajak betetzeko gehienezko epea astebetekoa izango da.
  4. Bulego teknikoak sarbide zuzena izango du enpresaren langileak fitxatzeko sistemaren plataformara, une oro lorezaintza-lanetan 9 pertsona daudela kontrolatu ahal izateko.
  5. Enpresak lan-planak egingo ditu urtea amaitu arte (bata irailaren amaierara arte eta bestea urteko azken hiruhilekorako).
  6. Enpresak hilero bilera bat egingo du Udaleko arduradunakaz, kontratua behar bezala gauzatzen dela egiaztatzeko.
  7. Enpresak prestakuntza osagarriko saio bat egin beharko du aurten, gutxienez 8 ordukoa. Prestakuntzaren gaia enpresak eta langileek adostuko dute.
  8. Zerbitzua modu kuantitatiboan zein kualitatiboan behar bezala emateko beharrezkoak diren makineria eta bitarteko lagungarriak izango dira.
  9. Hitzarmen kolektiboaren negoziazioari dagokionez, bi alderdiek (enpresak eta sindikatuak) bilera bat egingo dute, hitzarmen horren baldintzak berrikusteko.

Puntu horiek guztiak abuztuaren 21eko bileraren aktan daude jasota, eta Sopelako Udalaren web-orriko Gardentasunaren atarian kontsulta daiteke. Udalak nabarmendu du aipatutako puntu horien gaineko kontrol zorrotza egingo dela.

Jendartea Sopela
Irakurle agurgarria:

HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.

Egin zaitez HIRUKAlagun eta gozatu euskaraz!


Izan zaitez HIRUKAlagun