Astelehenek zinema kutsu bat izaten jarraituko dute "Ikusi, Ikasi, Aztertu" tailerragaz; Kurtzio Kultur Etxean izango da 19:00etatik 21:00etara. Joan den ikasturtean ere harrera bikaina izan zuen tailer honek, izan ere, bidaia entretenigarri eta didaktiko bat proposatzen du zinemaren sorreratik, eta zazpigarren artearen maitaleei zuzenduta dago, zehazki, ikuspuntu kritiko eta analitikoa aberastu gura dutenei.
Tailer multitematikoak nagusi izango dira aurten: martitzenetan, 19:30etatik 21:00etara, Tango Argentinarraren txanda izango da udal pilotalekuan, baita argazkigintzarena ere (oinarrizkoa edo aurreratua) Kurtzio Kultur Etxean (18:00-19:30 eta 19:30-21:00). Eguaztenetan Euskal Dantzak (oinarrizkoa edo aurreratua) izango dira Sopela Institutuan (Iberre) 18:00etatik 19:30etara eta 19:30etatik 21:00etara. Eguenetan Photoshop Tailerra Kurtzio Kultur Etxean 19:00etatik 20:30era;eta bestalde, barikutan Haurrentzako Pintura Tailerren txanda izango da 17:00etatik 18:30etara. Bukatzeko zapatutan Xake tailerra egingo dute (oinarrizkoa edo aurreratua) 11:30etik 13:00etara.
Izen-emateak
Tailerrek 70 eta 110 euro bitarteko kostua izango dute. Izen-emateei dagokienez, udalerrian erroldatutako pertsonek irailaren 17ra egin ahal izango dute, eta erroldatu gabeko pertsonek irailaren 18tik 24ra. Izena aurrez aurre eman ahal izango da Kurtzio Kultur Etxean edo Udaleko webgunearen bidez. Plazak inskripzio-ordenaren arabera esleituko dira.