Etxebizitza eskaintzarik ez dagoenez prezio arrazoitsu batean, eta bizi-proiektu bat garatzeko etxebizitza duinik eskuratu ezin duten bizilagunen eskari zabaltzeko xedeagaz, Sopelako Udalak ordenantza bat egiteko prozesua hasi du, bizitegi-eraikinetako beheko solairuetako lokaletan etxebizitzak ezartzeko.
Sopelako alkatea den Guruzne Carrassonek adierazi duenez, ordenantza honen bidez, lurzoru berririk erabili behar ez duten etxebizitza eskuragarrien kopurua handitu gura dute: "Erabili ez diren lokal horien jabeek lokal horietarako irteera bat izan dezaten nahi dugu; era berean, kokatuta dauden eremuen irudia hobetzen da, eraikitako ondarea optimizatzea eta pertsonek etxebizitza duina izateko duten eskubidea erraztea helburu izanik".
Horrela, arau honen helburua da itxitako eta merkataritza-funtziorik gabeko lokal horiek babes ofizialeko etxebizitza bihurtzea, eskaintza prezio merkeagoakaz handituz eta etxebizitza duin bat eskuratzeko aukera erraztuz, bizigarritasun-baldintza egokiak dituzten etxebizitzak izatearen kaltetan izan gabe.
"Hala ere, neurri horrek ezin du udalerriaren merkataritza-garapena kaltetu. Horrela, zentzuzkoa dirudi merkataritza-lokalak etxebizitza bihurtzea posible den eremuak mugatzea, eta ez udalerriko merkataritzaren garapena zigortzea", ziurtatu du Carrassonek.
Etxebizitza horiek eskuratu edo eskualdatzeko baldintza ekonomikoak eta Eusko Jaurlaritzak Babes Publikoko Etxebizitzetarako (BPE) ezarritako berberak izango dira.
Kontsulta
Hori arautzen duen lege-testua egin aurretik, kontsulta publikorako aldi bat ireki da, herritarrek beren ekarpenak eta iritziak aurkez ditzaten. Kontsulta publikoa egiteko epea 2023ko abenduaren 13ra arte egongo da zabalik, eta Sopelako Udaleko erregistro elektronikoan eta Sopelako Udaleko herritarren arretarako bulegoetan egin ahal izango da, 09:00etatik 13:30era.
Halaber, Administrazio Publikoen Administrazio Prozedura Erkidearen urriaren 1eko 9/2015 Legearen 16.4 artikuluan jasotako gainerako bitartekoen bidez aurkeztu ahal izango da.
Batzar publikoa
Azkenik, parte-hartzea bultzatze aldera, azaroaren 23an, eguenean, 19:00etan, Sopelako udaletxeko sarreran herritar guztiei irekitako batzar publikorako deia egiten da, ordenantza honen proiektuaren alderdi esanguratsuenen berri emateko.