Hiri-mugikortasuna denbora errealean aztertzeko Alertum proiektuan parte hartuko du Sopelako Udalak

Nahia Martinez Gondra 2024ko urt. 25a, 09:43
Akilino Arriola kalean, oinezkoak, bizikletak eta ibilgailuak zenbatzeko sistema bat ezarriko dute © SOPELAKO UDALA

HAZITEK 2023 programaren ikerketa-proiektu bat da Alertum, Eusko Jaurlaritzak (enpresetako I+G laguntzeko proiektuak) eta Eskualde Garapeneko Europako Funtsak (EGEF) batera finantzatua, Tecnaliagaz (ZTBESko agenteagaz) lankidetzan. Proiektuaren helburu nagusia da inguru horretan ibilgailuen zein oinezkoen joan-etorrien patroiak zehatz-mehatz aztertzea, hala, ondorio sendoak ateratzeko. Hala, Akilino Arriola kalean, oinezkoak, bizikletak eta ibilgailuak zenbatzeko sistema bat ezarriko dute, bide horretako pilaketen egoerari buruzko informazioa denbora errealean emateko asmoz. Gainera, kudeaketa-plataforma bat jarriko dute martxan Udaletxeko plazaren eta San Pedro elizaren ondoko biribilgunearen arteko hiri-espazioko fluxuak monitorizatzeko. Prototipoa gaur, urtarrilak 25,  jarriko dute eta martxoa amaitu arte egongo da martxan.

Instalatuko duten beste berrikuntza bat laster hiri-altzari bat izango da: Akilino Arriola eta Landa Doktorea kaleen arteko bidegurutzean jarriko dute, eta, modu horretan, inguru horren momentu oroko egoerari buruzko informazioa emango zaie biztanleei. Hala, pilaketarik izanez gero, gailu horrek Enrike Urrutikoetxea kaletik jarraitzeko gomendatuko die bizikletariei eta ibilgailuei. Era horretan, igarobide pilatuan sartzea saihestu eta biztanleen bizi-kalitatea hobetuko dute.

Emaitzak aztertzean, Sopelako ibilgailuen eta oinezkoen arteko bizikidetza harmoniatsua sustatuko duten neurri estrategikoak ezartzeko oinarriak eraikiko dituzte. Modu horretan, xedea da Akilino Arriola ingurua oinezkoentzako ingurune egokiago eta abegikorragoa bihurtzea.

Sopelako alkate den Guruzne Carrasson alkatea "gogotsu" agertu da ekimenagaz: "Gure herritarren bizi-kalitatea hobetzen duen berrikuntzarekin konprometituta gaude. Alertum-ekiko lankidetza horri esker, hiri-mugikortasuna kudeatzeko irtenbide aurreratuak azter ditzakegu, funtsezkoak baitira ingurune seguruagoak eta eraginkorragoak sortzeko gure ahaleginean". 

Halaber, prototipoa 2024ko martxora arte instalatzeak ez dakarkio inolako gasturik Sopelako Udalari. Hauek dira proiektuaren bazkide diren enpresak: Leycolan, Digital Future, Dynicon eta Urbabil; eta horiekaz batera Tecnalia ere.

Irakurle agurgarria:

HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.

Egin zaitez HIRUKAlagun eta gozatu euskaraz!


Izan zaitez HIRUKAlagun