Beste urte batez, Sopela nazioarteko dantza-taldeen erdigune bilakatuko da uda garaian, bertoko euskal dantzari ere merezi duen lekua erreserbatuz. Aurten, uztailaren 19an, barikuan, egingo dute 37. Folklore Bizian jaialdia, eta arrastiko 20:00etan hasiko da, Sopelako Urgitxieta plazan. Hala, hiru protagonista nagusi izango dira udalerriko oholtza gainean: Bolivia, Tanzania eta Euskal Herria.
Alde batetik, Boliviako Manuel Acosta ballet folkloriko nazionala egongo da, euren herrialdean berezigarri diren flauten eta danborren soinuen presentzia indartsuagaz. Hala, Boliviako herritarren indarra eta goxotasuna islatuko dute dantzariek. Bestalde, Tanzaniako Lumumba talde folkloriko nazionalak ere euren mugimendu bereziak erakutsiko dizkiete sopeloztarrei. Izan ere, Tanzanian, dantza emozioak adierazteko modu bat da, baita arbasoakaz komunikatzeko bide berezi bat ere.
Azkenik, Andra Mari Dantza Taldea dago. Euskal dantzak lantzen dituen Galdakaoko taldea da, 1955ean sortu zena. 1965etik hainbat jaialditan parte hartu du, eta urtero-urtero, euskal dantzen ordezkari da Folklore Bizian jaialdian.
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
