Sopelako Txosna Batzordeak eta Udalak bilera bat egingo dute bihar, eguenean, 900 euroko findantzaren inguruko nondik norakoak argitzeko. Bien bitartean, batzorde horretako kideek elkarretaratzea deitu dute egun horretarako, udaletxearen aurrean, 18:00etatik aurrera.
Azaldu dutenez, 900 euroko fidantza jarri behar dute urtero txosnak jarri ahal izateko, eta urtero bueltatu zaie diru hori. Alabaina, abuztuan, Txosna Batzordeko asko oporretan zeudela, deitoratu dute alkatetza-dekretu baten bidez fidantza ez bueltatzea erabaki zuela Sopelako Udalak. Informazio hori irailaren 3an komunikatu zitzaien, txosnetako kide bat Udalagaz harremanetan jarri zenean.
Ebazpena Udaltzaingoaren txosten batean oinarrituta dago, batzordeko lagunen esanetan, "akatsez beteta dagoena eta ez duenak gertatutakoaren errealitatea modu egokian jasotzen". Horregatik, saminduta adierazi dute Alkatetzak Udaltzaingoaren bertsioari "erabateko sinesgarritasuna" eman diola haiekaz aldez aurretik harremanetan jarri barik.
Udalaren erantzuna
Sopelako Udalak jakinarazi du, "antzeko kasuetan gertatu ohi bezala, administrazioak behartzen duen prozesu bat jarraitzen ari dela eta azken emaitza prozesuaren amaieran jakingo dela". Gainera, onartu du Txosna Batzordeagaz izan beharreko komunikazioa "ez dela nahi bezain egokia izan". Horregatik, bihar, eguena, hitzordua zehaztu dute jazotakoari buruzko azalpenak "zuzenean" emateko.