Sopelako Udalak Bizkaiko Foru Aldundiak bultzatutako ekimenagaz bat egitea proposatu zuen; hala, Sopelbus doako zerbitzua izango da 12 urtetik beherako herritarrentzat. Udalak ezin du neurri hau automatikoki aplikatu, zerbitzu publikoak emateagatiko eta administrazio-jarduerak egiteagatiko tasak arautzen dituen ordenantza aldatu behar baitu lehenik eta behin. Otsaileko Osoko Bilkuran, ordenantzaren aldaketa onartu zen, eta egun batzuen buruan egongo da indarrean. Doako zerbitzua martxan dagoenean, Udalak ohiko informazio iturrien bitartez jakinaraziko du.
Sopelako Toki Garapeneko zinegotzi den Eder Garciak adierazi duenez, "neurri honek jarraipena ematen dio mugikortasun jasangarria, irisgarria eta inklusiboa bultzatzeko Gobernu Taldeak egindako apustu irmoari, Sopela kohesionatzen laguntzen baitu, eta abian jarritako beste ekintza batzuei jarraipena ematen die, hala nola Sopelbuseko karteldegiaren diseinua hobetzea, Bizkaibuseko markesinetan jartzea eta Larrabasterrako metroarekiko intermodalitatea errazteko ordutegietan egindako aldaketak".
Zer behar da doako zerbitzua izateko?
Neurri horretaz baliatu ahal izateko, txartel pertsonalizatu bat eduki beharko da. Hori Bizkaiko garraio publikoaren bezeroarentzako arreta bulego integraletan eskuratu ahal izango da. Txartela tutore arduradunak eskatu eta eskuratu ahal izango du, betiere doakotasun horren onuradun izango denaren argazkia eta NAN edota familia-liburua aurkezten baditu.
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
