Sopelak bat egin du Zero Zabor ekimenagaz

Nahia Martinez Gondra 2025ko api. 2a, 14:25

Zero Zabor ekimena. © SOPELAKO UDALA
Sopela BHI institutuan eta Ander Deuna ikastolan soberan geratutako janaria Larrabasterrako salmenta automatikoko hozkailu batean dago eskuragarri martxoaren 28tik aurrera. Hala, gura duenak doan eskuratu ahal izango du.

Elikagaiak alferrik galtzea ekiditen du proiektuak, eta, era berean, kontzientzia ere piztu gura du. Sopela BHI institutuan eta Ander Deuna ikastolan soberan geratutako janaria bildu, eta Larrabasterrako Urgitxieta plazan jarritako salmenta automatikoko hozkailura eramango dute. Gerora, nahi duenak doan hartu ahal izango du. Gaur goizean aurkeztu dute, Zero Zabor Fundazioarekin elkarlanean eta Sopelako Udalaren babesagaz.

Ikastetxeetako ikasleak zein jantokietako langileak dira proiektuaren protagonista nagusiak. Izan ere, janaria prestatzen den sukaldean hasten da prozesua. Plater bakoitza prestatu den ontzitik ontzi indibidualetara eramaten dira soberakinak, eta termikoki zigilatu. Ondoren, ikasleek etiketak ipintzen dituzte, eta hozkailura eraman. Proiekturako sortutako aplikazio bati esker, ontzi bakoitzaren etiketek askotariko informazioa eskaintzen dute. Era berean, norbaitek makinatik ontzi bat ateratzen duen bakoitzean, makinak informazioa bidaltzen die eskolan janaria prestatzen dutenei. Besteak beste, horri esker jakin ahal izango dute zer menutan sortzen den soberakin gehien.

Janaria berreskuratzeko ez ezik, hezkuntza alorrerako ere garrantzitsua dela uste du Guruzne Carrasson Sopelako alkateak: “Ikasleen inplikazio-maila oso altua da: haiek kudeatzen dute makinetako jatekoa, etiketak jartzen dituzte... Horrez gainera, elikagaien inguruan sentsibilizatzeko ere balio du, eta eskolatik kanpo ere, kontzientzia hartzen dute”.

Bide beretik jo du Aimara Arostegi Uriagereka Ander Deuna ikastolako zuzendariak ere: “Proiektu honi esker ohartu gara zenbat jateko egiten dugun eta zenbat ez den aprobetxatzen. Era berean, soberakin horiek zaborretara bota beharrean, erabilgarritasuna eman ahal zaiela ikusi dugu”. Aurrera begira, proiektu hau ikasleentzat baliagarria izango dela uste du Mamen Peña Sopela BHIko zuzendariak: “Ikasleak dira etorkizuna, eta, proiektu honek aukera emango die mundu jasangarriago bat lortzeko bidean".

Irakurle agurgarria:

HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.

Egin zaitez HIRUKAlagun eta gozatu euskaraz!


Izan zaitez HIRUKAlagun