Bultzibideko egurrezko pasabidea ordezkatzeko aurrerapausoak eman ditu Sopelako Udalak

Nahia Martinez Gondra 2025ko api. 29a, 12:34

Linea elektrikoa desbideratzea izango da hurrengo urratsa.

2024ko maiatzean, Bultzibide eta Lizarre kaleak lotzen dituen egurrezko pasabidearen kontserbazio-egoera eskasa ikusita, pasabidearen egitura ikuskatzeko eta konponketa-lanen irismena ezagutzeko eskatu zion Udalak Tecnalia enpresa espezializatuari. Ordutik, obra aurrera eramateko beharrezkoak izan diren azterketak eta proiektuak egin dituzte: azterketa geoteknikoa, eraispenaren inguruko azterketa, Iberdrolako linea elektrikoa desbideratzeko estudioa, eta amaitzeke dago pasarela berria egiteko proiektua.

Pasabidea metroaren bidearen gainetik igarotzen denez, beharrezkoa izan da CTB Bizkaiko Garraio Patzuergoagaz elkarlanean aritzea proiektua garatu ahal izateko. Udalak eta CTBko zuzendaritzak apirilaren 11n izan zuten azken bilera, eta konplexutasun handiko obrari aurre egiteko ibilbide-orri bat adostu zuten. Segurtasuna bermatzea eta obra ahalik eta azkarren gauzatzea adostu zuten bertan.

Sopelako Udala oso eskertuta dago proiektu honetan CTBagaz lankidetzan aritzeagatik, eta kontratazio eta exekuzio prozedura administratibo guztiak bizkortzeko borondatea adierazi dute, pasabide berria ahalik eta azkarren ezarri ahal izateko.

Linea elektrikoa desbideratzea izango da hurrengo urratsa, eta, haren ondotik, egurrezko pasabidea eraitsi eta egitura berria jarriko dute. Hasiera batean, obrak 235.100 euroko kostua izango zuela aurreikusi zuten, baina, apirilean, 412.000 euro gehiago bideratu dituzte proiektua garatzera. Guztira, 650.000 euro inguruko kostua izango dute lanek.

Irakurle agurgarria:

HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.

Egin zaitez HIRUKAlagun eta gozatu euskaraz!


Izan zaitez HIRUKAlagun