Sopelako Panderojoleak eta Sopela Kantari egongo dira zapatu honetako Gure Lurreko Merkatuan

Nahia Martinez Gondra 2025ko mai. 7a, 09:48

Zapaturo merkatua egiten ari dira, 10:00etatik 14:00etara, Larrabasterrako Urgitxieta plazan.© SOPELAKO UDALA

Martxoaren 29an egin zuten estreinakoz Gure Lurreko Merkatua Sopelan, hurbileko nekazaritzari bultzada emateko asmoz, eta, ordutik, zapaturo ari dira egiten, 10:00etatik 14:00etara, Larrabasterrako Urgitxieta plazan. Zapatu honetako merkatua, baina, berezia izango da: ohiko ekoizleez gainera, Sopelako Panderojoleak eta Sopela Kantari ariko dira goiza girotzen. Zehazki, 10:30etik 12:30era egongo dira Sopelako Panderojoleak, eta, haren ondotik, Sopela Kantariren txanda izango da, 12:30etik 14:30era.

Bizkaiko baserritarrek, baina, bereziki, Uribe Kostakoek, zuzenean ekartzen dituzte eurak ekoitzitako produktuak merkatura. Besteak beste, barazkiak, fruta, ogia eta arrautzak erosteko aukera egoten da. Zapatuan, kasurako, honako ekoizle hauek parte hartuko dute: Jon Bastante (Zornotza), Jon Ander Zalduegi (Bakio), Jagoba Galarza (Artea),  Ekokide (Zamudio), Mañeko (Mallabia), Gilda del Norte (Lezama), Amama Moduan (Errigoiti) eta Urigoitiko txorizoak (Orozko).

Sopelako Udaleko Toki Garapen Sailak bultzatu du ekimena, Jata Ondo Uribe Eskualdeko Landa Garapenerako Agentziagaz eta Bizkaiko Foru Aldundiko Natur Ingurune eta Nekazaritza Sailagaz lankidetzan. Orain arte egindako ibilbideagaz pozik dago Eder Garcia Toki Garapeneko zinegotzia: “Gure Lurreko Merkatuaren bitartez, kontsumo jasangarria eta ekoizleen lana balioan jartzen jarraitzen dugu, eta, era berean, Larrabasterra dinamizatzen dugu. Herritar guztiei egiten diegu azoka ezagutzera etortzeko deia”. 

Irakurle agurgarria:

HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.

Egin zaitez HIRUKAlagun eta gozatu euskaraz!


Izan zaitez HIRUKAlagun