2024ko azarotik 2025eko martxora bitarte, entzute prozesu bat abiatu zuten herriko enpresakaz eta ekintzaileakaz. Tarte horretan, Susana Zaballa aholkularitza zerbitzuaren laguntza izan zuten; izan ere, enpresa horrek, esperientzia luzea du halako prozesuak gidatzen. Prozesua aurrera eramateko erabilitako metodologia —ikuspegi estimulatzailea eta design thinking teknika— tresna egokia izan da plan estrategiko inklusiboa eta berritzailea diseinatzeko. Beti ere, parte hartzaileen ongizatea zaindu da, eta enpresen zein ekintzaileen beharrak eta indarguneak aintzat hartu dira. Hala, etorkizunean udalerrian egingo diren ekintzak, enpresek identifikatu dituzten beharretara egokituta egotea lortu gura izan da prozesuaren bitartez.
Denera, 30 bat enpresak eta ekintzailek parte hartu dute prozesu parte hartzaile horretan. Hori lortzeko, galdetegiak, banakako elkarrizketak eta aurrez aurreko bilerak egin dituzte, baita bi saio parte hartzaile ere, Susana Zaballa aholkularitza enpresako Miren Lauzirika langileak dinamizatuta: Enpresen Plan Estrategikoa diseinatzeko balio izan dute saio horiek.
Emaitzen dokumentua udalerriko enpresa-sare osoagaz partekatu da. Gainera, komunikazio-kanal hori irekita uztea erabaki da, elkarren arteko sarea indartzen jarraitzeko asmoz. Aurkezpenean adierazi zen bezala, lehenetsi ziren ekintzen inguruko informazioa ematen eta horiek praktikan jartzen jarraituko dute aurrerantzean.
Eder Garcia Toki Garapeneko zinegotziaren hitzetan: "Enpresei eta ekintzaileei zuzenean entzun nahi izan diegu, haiei laguntzeko eta Sopelako enpresa-sarea sendotzeko. Eskerrik beroenak eman nahi dizkiet prozesu honetan parte hartu duten guztiei; haien denborarik eta ekarpenik gabe, plan hau ez litzatekeelako posible izango. Gida baliotsua eman digute, eta horri esker, hurrengo urteetan egingo ditugun ekintzak sektorearentzat erabilgarriak izatea lortu nahi dugu. Dagoeneko ari gara ekintza batzuk lantzen, zehaztuta daudenean emango dugu horien berri”.