Sopelak arazo larria du etxebizitzaren alorrean. 2019an, batez besteko salerosketa-prezioa 250.115 eurokoa zen udalerrian; 2024an, aldiz, 320.798 eurokoa. Hau da, % 28,3ko igoera izan da bost urtean, eta horrek gainditu egiten du Behatokiak ezarritako %22,4ko muga. Alokairuen kasuan, igoera % 12,6koa izan da (2018an 745,8 euro ziren hilean, eta 2023an, berriz, 839,6 euro), eta etxebizitza ordaintzeko ahalegin ekonomikoa % 25,8koa da. Azken bi datu horiek ez dira nahikoak tentsio-eremu gisa izendatzeko, baina presio ekonomikoaren adierazle esanguratsuak dira.
Ondorioz, udal gobernu taldeak Sopela gune tentsionatu izendatzeko eskatuko dio Eusko Jaurlaritzari. Horretarako, diagnostikoa, justifikazio-memoria eta ekintza-plana aurkeztu behar ditu Udalak, eta, jada, enpresa espezializatu bati esleitu dio azterlana egitearen ardura. Gune tentsionatua izendapenaren bidez, Sopelako salerosketa-prezioak ezingo dira ehuneko zehatz batetik gora igo.
Arazoari irtenbidea emateko urratsak egiten
Etxebizitzaren arazoari erantzun bat ematea puntu estrategikoa da Udal gobernu taldearentzat, eta horrela jasota dago bere legegintzaldi planean. Daborduko, hainbat lan-lerro ditu abian Sopelako Udalak, hala nola, lonjak etxebizitza bihurtzeko ordenantza, Loiola eta Asuko BPE-en sustapenak eta Abaroko sektorearen plan partziala desblokeatzeko ekimena. Sopela gune tentsionatua izendatzeaz gain, Udal Gobernuak Alokabidegaz lankidetza hitzarmen bat sinatu gura du etxebizitza hutsak mobilizatzeko.
Guruzne Carrasson Sopelako alkatearen ustez, udalerriko etxebizitza-arazoei erantzun zehatzak emateko urrats bat gehiago da erabakia: "Eusko Jaurlaritzaren Etxebizitza eta Hiri Agenda Sailarekin lankidetza indartzen jarraitu nahi dugu, gazteei eta etxebizitza duina behar duten gainerako pertsonei bizitza-proiektu bat bermatzeko".