Guztira zortzi pilotari arituko dira: kontratua amaitu duten lau profesional (Iker Gordon, Esteban Gaubeka, Jagoba Madariaga eta Ibai Perez) eta Euskal selekzioaren aurrehautuan dauden lau bizkaitar (Ibon Garate, afizionatu mailako txapeldun Imanol Ibañez eta Gatikako Artepe klubeko Iker Sarria eta Xabi Ceni). Hasiera batean Fusto ere parte hartzekoa zen, baina, Argentinan dagoenez, ezin izango du jokatu.
Txapelketa irailaren 8an hasiko da, eta astelehenero partida bi jokatuko dituzte arrastiko 19:30etik aurrera. Ligaxka sisteman, aurrelari bakoitzak hiru atzelari desberdinakaz jokatuko du, eta alderantziz ere bai. Ligaxkako jardunaldiak irailaren 8, 15 eta 22an izango dira; finala, berriz, irailaren 29an, puntu gehien batu dituzten bi bikotek jokatuko dute.
Horrez gain, txapelketak Kurene Saria izango du: pilotalekuan eta pilotalekutik kanpo palaren baloreak hobekien ordezkatzen dituen pilotariarentzat.
Sarrerei dagokienez, ligaxkan 5 euro balioko dute; finalean, aldiz, 10 euro. Txapelketa osorako bonu berezia ere egongo da, 20 eurotan. Bonuak abuztuaren 23tik aurrera salgai egongo dira Sopelako frontoian, eta partida egunetan sarrerak txarteldegian erosi ahal izango dira.
Kureneko antolatzaileek azpimarratu dute ilusio handiz prestatu dutela hitzordua: “Ilusio handia jarri dugu txapelketa honetan, eta palaren egoera nola dagoen jakinda, denon artean ea beste bultzadatxo ematen diogun hainbeste maite dugun jokamoldeari, benetan behar duelako eta".
Pilotazaleek, beraz, badute hitzordua: Sopelako udal-frontoian, irailaren 8tik aurrera, palarik onena bertatik bertara ikusteko aukera izango dute.