Sopelako herritarrei alokairu publikoko etxebizitza duina eta egokia eskuratzeko bide horretan, Udalak urtero informazio kanpaina bat egin beharko du udal-komunikabideen bitartez Alokabidek etxebizitza hutsak mobilizatzeko dituen bi programei buruzko informazioa emateko; hots, Bizigune eta ASAP programak.
Mikel Tapia Sopelako Udaleko Hirigintza zinegotziaren arabera, Sopelan dagoen etxebizitzen arazoa "larria" da. Hori dela eta, "beharrezkoa da esku-hartze publiko ausarta, hutsik edo jenderik gabe dauden etxebizitza horiek benetan behar dituzten pertsonen eskura jarri ahal izateko".
Izan ere, Etxebizitzaren Euskal Behatokiaren azken txostenaren arabera, azken bost urteetan salerosketa prezioa KPI baino 3 puntu handiagoa izan da. Halaber, aurretiazko diagnostikoaren arabera, Sopelan erroldatuta ez dauden 883 etxebizitza daude. Hortaz, Sopelak etxebizitzaren merkatuan eremu tentsionatu izendatzeko baldintzak betetzen ditu.