Bart arratsaldean kaxalote pigmeo bat lehorreratuta agertu zen Sopelako Atxabiribil hondartzan, El Peñon tabernaren parean. Ibiltzen zeuden herritarrek larrialdi zerbitzuak abisatu zituzten; izan ere, animalia bizirik, baina oso ahulduta eta zaurituta aurkitu zuten.
SOS Deiakek 17:30ean jaso zuen abisua, Sopelako Udaltzaingoak animalia hondarrean zegoela berretsi eta gero. Ondoren, Plentziako Itsas Estazioko (PiE-EHU) eta SAREUS lehorreratze sareko teknikariak bertaratu ziren egoera baloratzera. Adituen arabera, animaliak bi metro baino gehiagoko luzera eta 165 kilo inguru zituen, eta oso egoera txarrean zegoen; une hartan itsasoak ez zuen barealdirik, eta beraz, ezinezkoa izan zen berriz uretara eramatea. Animalia lehorrean hil zen.
Gorpua Plentziako Itsas Estaziora eraman dute nekropsia egiteko. Azterketak argituko du zerk eragin duen lehorreratzea eta ea gaixotasunen bat, lesio mikroskopikorik edo patogenoen presentziarik dagoen. Adituek aurreratu dutenez, ikusitako zauriak hondarregaz edo harkaitzekaz talkan sortutakoak izan daitezke, eta hipotesi posibleen artean gaixotasun naturalek eragindako ahultasuna, plastiko-irensketa edo giza jardueren ondoriozko bestelako interakzioak daude.