Bideoak ez du soilik kirola erakusten; izan ere, dendetan, tailerretan, eskoletan eta hondartzetan egunero lanean ari diren pertsonen errealitatea jasotzen du. Shaper-ak, irakasleak, saltzaileak, argazkilariak edota ekitaldien antolatzaileak dira kontakizunaren ardatza, askorentzat zaletasuna dena ogibide bihurtu dutenak.
Grabaketak 2025eko udazkenean egin ziren Sopelako hainbat gunetan, itsasoari estu lotutako paisaian. Testuinguru horretan, surfaren kulturak eta tradizioak herrian duen pisua agerian geratzea gura izan dute, baita Arriatera-Atxabiribil, Barinatxe eta Meñakoz hondartzek eskaintzen duten ingurune berezia ere.
Ekimenaren atzean dagoen xedea askotan ikusezina den sare profesional hori balioan jartzea da. Izan ere, surfak eta skateak ehunka lanpostu sortzen dituzte Sopelan, eta Bizkaiko sektorearen fakturazioaren zati handi bat bertatik dator. Tokiko merkataritza eta ekintzailetza erdigunean jarri dira proiektu honetan.
Udalaren ustez, ikus-entzunezkoak komunitate horren indarra erakusteko balio du, eta azken urteotan antolatutako topaketa, azoka eta surf zinemaren estreinaldiekaz bat egiten du.