Egungo kudeatzailea den BPX Sport enpresagaz sinatutako kontratua ez dela bideragarria adierazi du Udalak. Pandemiaren ondorengo egoerak, Ukrainako gerrak eragindako kostuen igoerak eta azken urteetako testuinguru ekonomikoak egungo pleguak zaharkituta utzi dituzte, eta horren ondorioz, Udalak kontratua eteteko prozesua abian jarri du.
Onartutako planak herritarrek egunerokoan nabarituko dituzten hobekuntza zehatzak jasotzen ditu. Besteak beste, instalazioen mantenua eta garbiketa indartzea aurreikusten da, zerbitzuaren kalitatea hobetzeagaz batera. Horrez gain, etorkizunera begira, Abadesoloko kirol guneko instalazioak handitzea aurreikusten da, ekipamendu berri baten eraikuntzaren bidez.
Unai del Burgo jarduneko alkatearen esanetan, planaren helburua da "udal baliabideak modu arduratsuan kudeatzea, herritarrei eskaintzen zaien kirol zerbitzua hobetzea eta etorkizunean behar duen egonkortasuna bermatzea". Halaber, adin guztietako sopeloztarrek egunerokoan kirola egiteko aukera eskaini gura da, orain arte baino baldintza hobeetan.
Era berean, Udalak herritarren parte-hartzea sustatzeko Bideragarritasun Plana jendaurrean jarriko du, eta herritarrek hilabeteko epea izango dute ekarpenak eta alegazioak aurkezteko.