Aurten, Sopelako Kuadrilla Eguna ez da egun bakarreko festa izango. Talde antolatzaileak XV. urteurrena "merezi duen bezala" ospatzeko asmoa azaldu du, eta bi eguneko egitarau oparoa prestatu du barikutik hasita. Jaiak ohiko giro herrikoia mantenduko du, baina ekimen berriak eta indartsuagoak gehituko dituzte aurten.
Ospakizunak maiatzaren 15ean, barikuan abiatuko dituzte. Egunari hasiera emateko, kuadrillen arteko zelai erre partida jokatuko dute, herritarren arteko norgehiagoka eta barreak ziurtatuz. Ondoren, urteurreneko pregoia eta txupinazoa botako dute jaiari hasiera ofiziala emateko, eta iluntzean, plater eta mikro irekia egongo da herriko kaleetan zehar, herritarren sormenari bide emanez.
Zapatu goizean, jai-giroaz gain, gai sozialen inguruko hausnarketa egiteko tarteak ere lekua izango du, hala, etxebizitzaren auziari buruzko mahai-ingurua antolatuko dute, gaur egun bizi dugun egoera kezkagarria hizpide hartuta. Hausnarketa saio horren ostean, herri-bazkari jendetsua egingo dute. Horretan izena emateko azken eguna maiatzaren 9a izango da.
Bazkalostean, frontoiak hartuko du protagonismoa bi partida garrantzitsurekin. Batetik, pala partida herrikoia egingo dute Gilen Madrid eta Irati Irastorza, Leire Fuente eta Eneko Balboaren artean, eta, bestetik, errepresioaren aurkako pilota partida jokatuko dute. Jardunek antolatuta, luxuzko kartela izango du norgehiagoka honek: Goñi II eta Elizegi, Titin III eta Alduntzinen aurka. Partida hauetarako sarrerak Etxekhi Berrian, Frontoian edo 671 17 20 27 telefonoan eskuratu daitezke.
Egunari amaiera emateko, Sopelako urteurrenak lehen mailako hiru kontzertu eskainiko ditu. Lukiek taldearen rock doinuak, Potato talde beteranoaren reggae erritmoak eta Bidean erromeriaren festa-giroa izango dira gaua girotuko dutenak.