Burdin Hesia 80 kilometrotik gorako defentsa lerroa izan zen, Espainiako Gerra Zibilean Bilbo eta ingurua babesteko eraikia. Gaur egun, haren aztarnek balio historiko, arkeologiko eta sinboliko handia dute. Sopelan, Areneburu, Munarrikolanda eta Santa Marina inguruan kokatzen dira aztarna nagusiak, Berango eta Urdulizegaz partekatzen duen mendilerroan.
Proiektuaren lehen fasean, 2024an, ikerketa eta dokumentazio lanak egin ziren, defentsa lerroaren testuinguru historikoa aztertzeko eta udalerriko elementuak identifikatzeko. Horren baitan, Informazio Geografikoko Sistema bat sortu da, Burdin Hesiaren osagaiak kokatu eta haien egoera ezagutzeko.
2025ean hasi dira lehen jarduketak: sarbideak garbitu, sastrakak kendu eta norabide seinaleak jarri dira hainbat gunetan, betiere kontrol arkeologikopean. Halaber, panel informatiboak diseinatu dira, ondarearen inguruko informazioa zabaltzeko.
Datozen hilabeteetan, 2026ari begira, egituretan egin beharreko kontsolidazio lanak zehazten ari da Udala. Era berean, seinaleztapena osatu, panel interpretatibo zein irisgarriak jarri eta dibulgazioari indarra ematea aurreikusten da; besteak beste ibilbideak, material didaktikoak eta bisita gidatuak eskainiz.