Sopelak geoturismoaren arloan erreferente izaten jarraitu gura du, Flysch-a helmuga turistiko jasangarri gisa garatzeko lehentasunezko baliabidea dela iritzita. Eremu honek natura, kultura eta milioika urtetako historia uztartzen ditu, eta berritze-lan hauen bitartez, udalerriko aberastasun geologikoa ezagutzeko aukera errazagoa eta inklusiboagoa eskaini gura dute.
Irisgarritasunari dagokionez, egindako aldaketak funtsezkoak izan direla azpimarratu dute Udaleko iturriek: panelen altuera txikitu dute eta hurbiltzea zailtzen zuen beheko barra kendu dute, horrela pertsona guztien sarbidea bermatuz. Proiektu hau Jata Ondo Landa Elkarteagaz lankidetzan gauzatu dute, Uribeko eskualde-estrategiaren barruan, eta Ekobideak enpresaren aholkularitza teknikoa izan du.
Mugikortasun jasangarria ardatz
Mugikortasun jasangarria udalerriaren balio bereizgarri gisa nabarmendu gura izan du Udalak, garraio publikoagaz konektatutako turismo-eredua bultzatuz. Hori bermatzeko, Metro Bilbao, hondartzakaz lotura duen Sopelbus zerbitzua eta 2027an martxan jarriko den BizkaiBizi bizikleta sarea ditu ardatz.
Eder Garcia Toki Garapen saileko zinegotziak adierazi duenez, "turismoak iraunkorra izan behar du, baina funtsezkoa da, ahal den neurrian, pertsona guztientzat irisgarria izatea". Etorkizunari begira, panel berrituek ematen duten aukera baliatuz, Toki Garapen sailak bisita gidatuak antolatuko ditu, horien xehetasunak Udalaren kanalen bidez jakinaraziko direlarik.