Guenetxea Sopelako bizilaguna da eta gaur egun oposizioko zinegotzia da dedikazio esklusiboagaz. Bere ibilbide instituzionalean, alkateorde izan zen garaian, Kultura, Euskara eta Hezkuntza arloak kudeatu zituen, zerbitzu publikoen hobekuntzan eta gizarte-kohesioan oinarritutako profila landuz.
Sopelako alkategai jeltzaleak erakunde-eremutik haratago doan ibilbidea ere badu. Hainbat elkartegaz eta gizarte-eragilegaz lankidetza estua duela ere gaineratu du, bereziki dibertsitate funtzionalagaz lotutakoakaz (CEMEDETE, Down Sindromea, Aspace edo Fidias Fundazioa, besteak beste), eta tokiko kirol-esparruan ere oso aktiboa da.
Alternatiba "sendoa eta serioa"
EAJk egungo gobernu-taldearen jarduna kritikatu du, "inprobisazioa" eta "norabide falta" leporatuz. Testuinguru horretan, Guenetxearen hautagaitzak "herritarren lehentasunetan oinarritutako" alternatiba eskaini nahi du.
"Sopelak etorkizunean pentsatzen duen, herritarrei entzuten dien eta zorrotz jokatzen duen kudeaketa behar du", adierazi du Guenetxeak izendapenaren ostean. Jeltzaleek ziklo politiko berri bati ekin diote, "auzo guztien ongizatearekiko konpromisoa" ardatz hartuta, udal lidergoa berreskuratzeko helburuagaz.