Proposamenak ekintzailetzaren erronkak beste ikuspegi batetik lantzea proposatzen du, esperientziatik eta gorputzetik abiatuta, hain zuzen ere. Eder Garcia Toki Garapeneko zinegotziaren ustez, ekintzailetzak gaitasun teknikoez gain, bere buruarekiko konfiantza eta laguntza-sareak behar ditu, eta horregatik jotzen du garrantzitsutzat mota honetako espazioak bultzatzea.
Jardunaldia hiru gunetan eta fasetan egituratuko dute, goizeko 09:30etik 15:00etara. Lehenik, saio bat egingo dute Kurtzio Kultur Etxean beldurrak eta blokeoak lantzeko; ondoren, surf esperientzia kolektibo bat biziko dute hondartzan Peña Txuri Surf Eskolaren laguntzagaz; eta, amaitzeko, hausnarketa eta networking saio bat egingo dute bizitakoa lan-eremura eramateko.
Antolatzaileek azpimarratu dute ez dela beharrezkoa surfean aldez aurretik esperientzia izatea, helburua ez baita kirol-errendimendua, baizik eta ingurune aldakorretara egokitzeko gaitasuna lantzea. Ekimen honek emakume ekintzaileen errealitatea ikusarazi gura du, eredu jasangarriago eta kontzienteagoei buruzko hausnarketa sustatuz. Parte hartzeko plazak mugatuak dira, eta interesatuek maiatzaren amaierara arte daukate aukera informazio gehiago eskatzeko edo izena emateko udaleko Toki Garapen Arloaren bidez.