Udal-arduradunek adierazi duten moduan, EAEko herritarrek erakundeetan bi hizkuntza ofizialak erabiltzeko eskubidea izan beharko lukete, eta plan honen bidez, eskubide hori beteko dute, erakundeak bi hizkuntza ofizialen erabilera kudeatzeko tresnak eskura izango dituelako.
Honi esker, Udalak eskaintzen dituen arlo guztietan euskara erabiliko da: telefonoz zein telematikoki jaso daitekeen arretan, Udaletik bidalitako jakinarazpenetan, ziurtagirietan eta gisa horretako dokumentuetan, baita webgunearen bitartez egin ahal diren tramite guztietan ere. Gainera, iragarri dutenez, erakundean dauden errotulu guztiak ere elebitan jarriko dituzte, euskarari lehentasuna emanez.
Udaletik nabarmendu dute erabakiak elebitasuna bermatuko duela: "Herritar batek Sopelako Udalera deitzen duenean, lehen hitza euskaraz egingo zaio, eta herritarrak erabakiko du gurekin euskaraz jarraitu nahi duen edo gaztelaniaz hitz egin nahi duen".
Ildo horretan, azaldu dute langileen hizkuntza ohitura formalak zein informalak euskalduntzeko asmoagaz bi ikastaro eskainiko dizkietela: testugintzari dagokion euskarari buruzko prestakuntza-ikastaro espezifikoa, Uribe Kostako Mankomunitateen bitartez, eta ahozko komunikazioa indartzeko ikastaroa, Sopelako Udal Euskaltegiaren bitartez.
Azkenik, Udalak ohartarazi du planak barne- zein kanpo-harremanetan euskararen erabilera sustatzea duela helburu, euskal hiztunen egunerokotasuna erraztuz.