Toki Garapen Sailak antolatu du programa, Sopelako Turismo Bulegoaren bidez. Udalaren arabera, helburua Sopela turismo jasangarrirako helmuga gisa indartzea da, naturaren, paisaiaren, kulturaren eta milioika urteko historia geologikoaren balioa nabarmenduz.
Bisita guztiak goizez eta doakoak izango dira. Gainera, jarduera bakoitza landuko den gaian espezializatutako inguruko enpresen laguntzagaz egingo dute, parte-hartzaileei esperientzia hurbila eta kalitatezkoa eskaintzeko.
Programak hainbat ibilbide bilduko ditu datozen hilabeteetan. Lehenengoa, Panelen Ibilbidea, uztailaren 12an egingo dute. Ondoren etorriko dira Santa Marina baseliza eta Munarrira bisita, Meteoritoaren Ibilbidea, Meñakozeko kuxin labak, Burdin Hesiaren Ibilbidea eta Itsaslabarren Ibilbidea.
Udalak Sopelako Flyschean duela gutxi jarritako interpretazio-mahaiek bisitarien esperientzia aberastuko dutela nabarmendu du. Horien bidez, ingurune naturalaren balio geologikoa eta paisajistikoa modu errazagoan ulertu ahal izango da.
Informazio gehiago jasotzeko edo erreserba egiteko, Sopelako Turismo Bulegoagaz jarri behar da harremanetan, turismo@sopela.eus helbidera idatzita edo 94 406 55 19 telefonora deituta.