Guztira, lau gunetan egingo dute proba, 2.600 metro koadro inguruko azaleran. Udalak azaldu duenez, helburua ez da berdeguneak zaindu gabe uztea, soropilaren ohiko mantentze-lanak egokitzea baizik, ingurune horiek biziagoak, anitzagoak eta erresilienteagoak izan daitezen.
Ekimen hau Sopelako Zuhaizti Planeko kudeaketa-proposamenen barruan kokatzen da, eta joan den martxoan egindako Sopelako Eraztun Berdearen Kontseiluan eskatu zen martxan jartzea. Udalaren asmoa egungo berdeguneak gaur egungo ingurumen-erronketara hobeto egokitzea da.
Proba pilotuaren bidez, espezie autoktonoen presentzia handitu, hiri-eremuetako habitat-ak hobetu zein herritarren eta naturaren arteko lotura indartu gura dute. Gainera, kudeaketa-eredu horrek lurzoruaren kalitatea hobetzen lagun dezake, hezetasuna atxikitzeko gaitasuna handituz; eta mantentze-lanei lotutako emisioak ere murriztu ditzake, mozketen maiztasuna txikiagoa izango delako.