Jardunaldia Kurtzio Kultur Etxean abiatu zen. Bertan, Sopelatik, Getxotik, Santurtzitik, Galdakaotik eta Bilbotik etorritako emakumeek ekintzailetzaren bidean agertzen diren oztopo eta erronkei buruz hausnartu zuten. Beldurrak, zalantzak, autolimitazioak eta horiek erabaki profesionaletan duten eragina izan zituzten hizpide, surfaren metafora abiapuntu hartuta.
Goiz erdian, parte-hartzaileak Arrietara hondartzara joan ziren, Peña Txuri Surf Eskolaren eskutik hitzaldi eta surf saio batean parte hartzera. Bertan, surfaren eta ekintzailetzaren arteko antzekotasunak landu zituzten modu praktikoan: ingurua interpretatzen ikastea, dena norberaren kontrolpean ez dagoela onartzea eta une egokiaren zain egoten jakitea, edo ziurgabetasunen gainetik ausartzea.
Antolatzaileen esanetan, erortzea ere ikaskuntza-prozesuaren parte da, bai surfean bai ekintzailetzan. Gauzak espero bezala ez ateratzeak ez du esan gura helmugarik ez dagoenik; aitzitik, berriro arraunean hasi eta hurrengo aukera bilatzeko gonbita da.
Jardunaldia networking saio bategaz amaitu zen. Parte-hartzaileek esperientziak eta ikaskuntzak partekatu zituzten, kontaktu berriak egin eta etorkizuneko lankidetzen oinarriak jartzeko aukera izan zuten.
Esperientziaren balorazioa oso positiboa izan zen. Parte-hartzaileek nabarmendu zuten jardunaldiak aukera eman ziela beren erosotasun-eremutik ateratzeko eta beste emakume batzuekaz batera erronka berri bati aurre egiteko, beldurra erlatibizatzen eta esperientziaz gehiago gozatzen lagunduz.