Eusko Jaurlaritzako Industria, Trantsizio Energetiko eta Jasangarritasun Sailari atxikitako URA-Uraren Euskal Agentziak eta Sopelako Udalak adierazi dutenez, erabaki horregaz, hiri-hezegune berri bat sortu ahal izango da udalerrian, eta Gobela eta Lemotza ibaien artean dagoen espazio baten balio ekologikoa hobetuko da.
Udalak dioenez, esku-hartzea 10.000 metro koadro inguruko eremu batean egingo da, udal kiroldegiaren eta Ugeragako futbol-zelaiaren parean. "Ur-xafla hori askotariko sakonerekin diseinatu da: uretako hegaztientzat, anfibioentzat, narrastientzat eta hezeguneei lotutako intsektuentzat egokiak diren habitatak sortzeko", adierazi dute, zera gehituz: "Gainera, faunarentzako atsedenerako uharte txikiak eta espezie askoren babesleku izango diren egitura naturalak prestatuko dira".
Obren helburua ingurunean dauden espezieen biodibertsitatea handitzea eta Sopelako hiri-bilbean integratutako natur-gune bat finkatzea dela nabarmendu dute, klima-aldaketara egokitzeko eta herritarrei naturaragaz harremanetan egoteko espazio berriak eskaintzeko.
Proiektuaren obrak
Udalak gaineratu duenez, oraingoz, faunari ahalik eta kalte gutxien eragiteko eta natura-elementu interesgarrienak babesteko, eskuz eta gaika sastrakak kentzeko eta lurrak prestatzeko hasierako lanak antolatzen ari dira. Hori amaitutakoan, hainbat zundaketa egingo dira lurraren karakterizazioa osatzeko, eta, ondoren, lur-mugimenduak hasiko dira, aintzira berriari forma emateko. Lan horiek guztiak, udako hilabeteetan luzatuko direla azpimarratu dute.
Bestalde, aurreratu dute proiektuak barne hartzen dituela landare-espezie inbaditzaileak kentzea, baso atlantikoetako berezko tokiko landaredia lehengoratzea eta oinezkoentzako bide berri bat sortzea. Gainera, jarduera bereziki tokiko balio naturalak kontuan hartuta diseinatu dela eta obrek balio horiek babesteko neurri espezifikoak hartzen dituztela aitortu dute.