San Pedro jaietan izandako jokabide desegokiak ikusita, Udalak zerbitzua erabiltzeko baldintzak egokitzea erabaki du. Hala, Txu Txu Trena 12 urtetik beherako umeentzat izango da, eta adingabe guztiek heldu arduradun baten laguntza eta gainbegiratzea izan beharko dute. Helburua da jarduera modu seguruan garatzea eta txikienentzako espazio egokia bermatzea.
Udalak gogorarazi du zerbitzura sartzeak erabilera-arauak onartzea dakarrela. Besteak beste, debekatuta egongo da trena martxan dagoela igotzea edo jaistea, eserlekuetatik altxatzea, bagoien artean mugitzea, objektuak kanpora ateratzea, erretzea edo alkohola kontsumitzea. Antolakuntzak arauak betetzen ez dituztenei sarrera ukatu edo trenetik jaisteko eskatu ahal izango die, eta herritarren laguntza eskatu du jarduera giro seguru eta atseginean egin dadin.
Gainera, adierazi dute Urgitxieta kalean egiten ari diren obren ondorioz, ohiko irteera-puntua aldi baterako aldatu dutela. Hori dela eta, trena Urkoko harrera-eraikinaren aurrean dagoen behin-behineko geltokitik abiatuko da egun horietan.