Larrabasterrako Urgitxieta plazan dagoen makinari esker, 6.180 janari-errazio berreskuratu dituztela zenbatu dute, eta jaki horiek herritarren eskura modu seguruan eta errazean jarri direla nabarmendu dute. Zehaztu dutenez, horietatik, 3.955 (%64) Sopela BHIkoak izan dira, eta 2.225 (%36) Ander Deuna Ikastolakoak.
Udaletik gaineratu dutenez, proiektu "berritzaile" honek, elikagaiak alferrik galtzea ekiditen du, eta hezkuntza-zentroetako jantokietako soberakinak aprobetxatzea eta herritarrak elikagai-hondakinak murriztearen garrantziaz kontzientziatzea du helburu.
Gainera, nabarmendu dute zerbitzuak harrera oso ona izan duela herritarren artean; izan ere, eskuragarri jartzen dituzten errazioak ordu gutxiren buruan agortzen dira. Gutxi gorabehera, makina husteko batez besteko denbora hiru ordukoa dela adierazi dute; ekainean, gainera, denbora hori 2,5 ordura jaitsi zen, baliabide honek duen eskari handia agerian utziz.
Ildo berean, azpimarratu dute Rexcatering proiektuak ez duela bakarrik elikagaiak alferrik galtzea saihestea helburua, baizik eta eragin sozial handiagoa izaten duela: "Sistemak egoera ezin hobean dauden elikagaiei bigarren bizitza bat ematea ahalbidetzen du, komunitatearentzat baliabide erabilgarri eta doakoa da, eta, aldi berean, hondakin gutxiago sortzea eta elikagaiak alferrik galtzeari lotutako CO2 emisio gutxiago sortzea eragiten du".
Orain, udako oporrak direla eta, zerbitzua eten egingo da, baina ikasturte berrian hastean berriz jarriko dute martxan; jantokietatik datozen askotariko platerak eskuragarri jarrita: lekaleak, kremak, arraina, haragia,
pasta, arroza, tortillak, postreak eta prestatutako beste hainbat jaki, betiere elikagaien segurtasuna bermatuz.