Udalak gaineratu duenez, ekimenaren helburua Sopelako biztanleen artean euskarazko literatura-sorkuntza bultzatzea, lanak saritzea eta obra irabazleak ezagutaraztea da.
Azaldu dutenez, lehiaketan 16 urtetik gorakoek parte hartu ahal izango dute, banaka edo taldeka, betiere Sopelan gutxienez urtebetez erroldatuta badaude. Lanak aurkezteko epea urriaren 31n amaituko da.
Lanen zehaztapenei dagokienez, Udalak azpimarratu du aurkeztutako lan guztiak berriak eta inoiz argitaratu gabeak izan behar direla. Gainera, euskaraz idatzita egotea derrigorrezkoa izango da. Horiek aurkezteko bi modu egongo dira: aurrez aurre Sopelako Udaleko Erregistro Orokorrean edo Larrabasterrako Herritarrentzako Arreta Bulegoan; edo telematikoki, Udalaren egoitza elektronikoaren bidez.
Sariei dagokienez, guztira 5.000 euro banatuko dituzte. Komiki modalitateko lan irabazleak 2.000 euro jasoko ditu, eta narratiba, poesia eta antzerki modalitateetako irabazleek 1.000 euroko sari bana izango dute. Saritutakoek euren lanak aurkezteko ekitaldi publiko batean parte hartu beharko dute, Euskararen Astearen barruan.