Zerbitzua EYSAren Mowiz plataformaren bidez jarri dute martxan, eta erabiltzeko hainbat aukera daude: Mowiz aplikazioa deskargatzea, webgunetik sartzea edo Sopelako parkimetroetan jarritako QR kodea eskaneatzea. Azken bi kasuetan ez da beharrezkoa erregistratzea. Matrikula sartu, aparkatzeko denbora aukeratu eta ordainketa egitea besterik ez da egin behar.
Ordainketa egiteko moduak ere zabaldu dituzte. Banku-txartelaz gain, Bizum, Apple Pay eta Google Pay erabili ahal izango dira. Bizumen kasuan, gainera, ez da bankuko daturik sartu beharko, eta horregaz ordainketa-prozesua arintzea gura dute.
Mowiz aplikazioa deskargatzen dutenek, berriz, aukera gehiago izango dituzte. Besteak beste, aparkatzeko denbora urrutitik luzatu ahal izango dute, parkimetrora bueltatu beharrik gabe, eta txartela amaitzear dagoenean abisua jasotzeko aukera izango dute.
Sistema ez da Sopelan bakarrik erabiltzen. Gorlizen ere martxan dago, baita Gasteizen, Errenterian, Beasainen, Getarian eta Orion ere. Datozen hilabeteetan beste udalerri batzuetara zabaltzea aurreikusten dute, tartean Bilbora.