Udaletik adierazi dutenez, Udalak herritarren eta herriko gazteen eskaerari erantzunez bultzatutako proiektua da hau, eta kirol urbanoak (skateboarding, gurpil gaineko patinajea, surfskate...) sustatzea da bere helburu nagusia. Obretan ez dela zuhaitzik moztuko eta daudenak skateparkaren ingurura mugituko direla azaldu dute ere.
Proiektuak bowl edo katilu motako skatepark bat eraikitzea aurreikusten du: lurrean induskatutako sakonune bat izango da, 215,27 m²-ko azalerakoa eta hormigoi jarraituzko gainazal kurbatua duena. Horrez gainera, ertz nagusietan Ø60 mm-ko altzairu beltzezko coping hodiak jarriko dira, eta arrapalaren luzapenean pool coping motako akabera prefabrikatua erabiliko da. Udalaren arabera, parkearen diseinua hastapen-mailako kirolariei zein esperientzia handiagoa dutenei egokituta dago.