Umeek etxetik eskolara arteko bidea modu iraunkor, autonomo, osasuntsu eta seguruan egiteko proiektua jarri du martxan Urdulizko Udalak, Elortza eskola publikoaren eta ikasleen guraso-elkartearen laguntzagaz. Hala, proiektuaren esperientzia pilotua egin zuten ekainaren 1etik 19ra bitartean. Lehenengo egunean, 40 bat umek parte hartu zuten, baina, amaierarako, guztira, 105 izan dira parte-hartzaileak.
Ibilbide bi egin dituzte. Horietako batek Aita Gotzon kalea zeharkatzen zuen, trenbide-pasagunetik eskolaraino; bestea Zugazti plazan hasten zen. Esperientziaren azken egunean, ibilbideari jai-giroa eman zioten, hiru aste horietan ibilbidea egin zuten umeak zoriontzeko. Hala, hartz itxurako giltzatakoak banatu zizkieten umeei.
Eskolarako Bidea proiektua Francesco Tonucci pedagogo italiarrak egindako esperientzietan egon da oinarrituta; egunotan bere proposamenak entzuteko aukera egon da Leioan. Umeak eskolara egiten dituzten bidaien protagonista bihurtu ditu ekimenak. Haurren autonomia-eredua sustatu du, ingurua aztertuz, kanpokoagaz harremanetan ipiniz eta erabakien kontzientzia hartuz. Arduradunek azaltzen dutenez, proiektuak zeregin gizarteratzailea eta hezigarria betetzen du.
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
