Batez ere Urdulizko eta Uribe Kostako herrietakoak izan ohi dira parte-hartzaileak baina, bertokoez gainera, badira bestelako lekuetatik etorritakoak ere. Lehiaketa honen hasiera-hasieratik, Txori Alai kultur elkarteak antolatzen du txapelketa, eta Urdulizko Udalak babesa ematen dio ekimen honi. Aurreko edizioetan, 50 lapiko inguru aurkeztu izan dira festa herrikoi horretan. Bertan ez da saririk ematen dirutan eta parte-hartzea da saritzen dena; koadrilei garaikurrak eta opariak ematen zaizkie, baina dirurik ez. Izan ere, lehiaketa horrek ez du irabazi asmorik. Aisialdiko proposamen gastronomiko hutsa da, herritarren partaidetzan oinarritutakoa eta parte hartzerako orduan koadrilek erakusten duten inplikazioa da, finean, epaimahaiak saritzen duena.
Izaera herrikoi hori indartzeko asmoz, Urdulizko Buztanluze Sukalki Txapelketak jarduera osagarriz betetako egitarau zabala eskaintzen du. Ekimenak zapatu goizean abiatuko dira, txistulariek kalejira egingo baitute herri osoan zehar. Gainera, egun osoan beste zenbait kultur-proposamen egongo da; esate baterako, dantza edo erromeria.
Egitaraua
- 09:00 - Txistulariak herriko leku ezberdinetatik.
- 12:00 - Iratxo Gorria dantza-taldearen ekitaldia.
- 12:45 - Izena emateko epearen amaiera.
- 13:30 - Kazolen aurkezpena eta epai mahaiaren xede-hartzea.
- 18:00 - Sari banaketa.
- Ondoren, Taberna Ibiltaria taldeak girotutako herri erromeriaz disfrutatzeko aukera izango da.