Zapatu honetan, abuztuak 8, Joseba Amaro Corpas zenari gorazarre egingo diote, urduliztarrak zeuzkan zaletasun nagusi biak uztartuz: musika eta motorrak. Dabelyu rock-taldeko gitarra-jolea otsailaren 19an hil zen istripuan, Unbe gainean bihotzekoak eman, eta motorretik erori zenean. Amarok etxetik Dabelyuren lokalera egin zuen azken ibilbide hura motorren gainean egingo dute senide eta lagunek, abuztuaren 8an, ekitaldiei hasiera emateko. Helmugara helduta, Iratxo Gorria Dantza Taldeak erakustaldia eskainiko du. Segidan, pintxo-poteoan abiatuko dira Urdulizko tabernetatik futbol-zelai zaharreraino. Bertan, herri-bazkaria (haragi-paella) egingo dute 14:30ean.
Hainbat tabernatan egongo dira izen-emateko zerrendak (10 euro): besteak beste, Txiberri, Bumbo, Urduliz, Txiki-Barri eta Txozna. Musikari dagokionez, 16:30ean hasiko dira jotzen bertoko taldeak; eta 20:00etan Dabelyu, Quaoar, Vita Imana eta Hamlet bandak; sarrera doan izango da. Horrez gainera, ordenagailu eramangarria eta beste hainbat gauza zozkatuko dituzte; txartelak 3 euroan egongo dira.
info+: homenajeajoseba@gmail.com
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!