Urdulizko kultura tailerretan izena emateko epea irekita

Udaren amaiera ate joka dugu, eta horregaz batera ikasturte berriaren hasiera. Hori horrela, martxan dira 2015-2016 ikasturterako tailer ezberdinetan parte hartzeko izena emateko epeak, Urdulizko Kultur Etxeak antolatzen dituen tailerretan, berbarako. Ikastaroak udalerrian eta kanpoan erroldatutako lagunei begirakoak izango dira; hala ere, ohi legez, bertokoek lehentasuna eta prezio bereziak izango dituzte. Interesa dutenek honako tailerrak izango dituzte aukeran: zur-lanketa, trikitia, puntu eta kakorratza, yoga, ehoziri-lanak, joskintza, ekialdeko dantza, dantza aerobikoa, musika eta mugimendua, helduentzako pianoa, umeentzako pi­anoa, helduentzako margotzea eta umeentzako margotzea; kultur etxera jo beharko dute horietakoren batean izena emateko. Matrikula, ostera, udaletxean ordaindu beharra dago, eta gero ordainagiria eta izena eman izanaren  orria kultur etxean aurkeztu. Kurtso bakoitzak prezio bat du, eta ordainketa egiteko, dena batera edo zatika pagatu ahal izango da.