Urdulizen metroa lurperatzeko lanak direla-eta, bertako Aita Gotzon kaleko zati bat ibilgailuentzat itxi eta trafikoa desbideratu egingo dute, datorren asteartetik, urriak 13, aurrera. Udalak jakinarazi duenez, zehazki, 300 metro inguruko errepide-zati bat itxiko da trenbide-pasagunearen inguruan, hau da, lanak egiten dabiltzanlekuan. Aipatutako zatia hiru astez egongo da itxita trafikorako. Hori horrela, alde batetik, lanak arinduko dira, eta, beste aldetik, "murriztu egingo dira lanek inguruan bizi diren herritarrengan izango dituzten eraginak", Udalak azpimarratutakoaren arabera.
Zirkulazio-aldaketak
Sopelarako noranzkoan: Urdulizko udaletxearen ingurutik Aita Gotzon kaletik etorriz gero, behin Kultur Etxearen ondoko biribilgunea igarota, ibilgailuek eskumaranzko lehenengo sarrera hartu beharko dute, Basterretxe kaletik. Kale horren amaieran, ezkerrerantz hartu beharko dute, eta aurrez aurre joan Antsonekoa kaletik, Barrikako Bidea kaleraino. Bertan, ezkerrerantz hartu beharko dute, eta kale horretatik jarraitu, errepide nagusira heldu arte, berriro Aita Gotzon kalean.
Plentzia-Mungiarako noranzkoan: Sopelatik etorriz gero, Garbigunearen ondoan dagoen biribilgunea igarota, autoek lehenengo kalea hartu beharko dute ezkerrerantz: Barrikako Bidea. Kale horren amaieran, eskuinerantz hartu beharko dute, eta Antsonekoa kaletik jarraitu, Torre kaleraino. Bertan, eskumarantz hartu beharko dute, eta errepide nagusiraino jarraitu, Aita Gotzon kalera.
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
