Leioa, Getxo eta Berango bisitatu ostean, Urdulizera helduko da ArgIHIzkiak Uribe Kostako literatura-lehiaketaren erakusketa. Hala, Uribe Kostako edo berton bizi diren 10 argazkilariren irudi bana eta horietan oinarritutako euskarazko 20 testu labur onenak ikusi ahal izango dira, hilaren 18tik 31ra bitartean, Urdulizko kultur etxean (Aita Gotzon, 16). Erakusketa bisitatzeko ordutegia honakoa izango da: astegunetan 10:00etatik 13:30era, eta 16:00etatik 21:00etara; eta zapatuetan, 09:30etik 14:00etara.
Lehiaketa Egizu Getxo Euskaldun elkarteak eta HIRUKAk antolatzen dute, Uribe Kostako hainbat udalegaz (Leioa, Berango, Getxo; eta Makomunitatea) eta zenbait elkartegaz (Bizarra Lepoan, Berbots, Aitxu!, Leioako berbalagunak) elkarlanean. Literatur ekimenaren helburuak dira: jendea euskaraz idaztera eta irakurtzera animatzea, eta Uribe Kostako argazkilariak eta euren lana zabaltzea.
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!