Besteak beste, Urduliz Rural-a eta Sopela SUSAN (Sopela-Urdulizko Sahiesbidea Noizko) taldeen babesa dauka herri-ekimenak. Horiez gainera, ospitaleak barne hartuko dituen hainbat herritako auzotarrek ere osatzen dute UOP.
Udalei igorriko dieten idazkian aitortu duten legez, "kezkatuta" daude osasun-zentroak izango duen eraginagaz, "aurreikusi ez diren arazoak" ekarriko dituelakoan. Horregatik, udalei honako bost punturen gaineko informazioa eskatu diete: garraio publikoan sor daitezkeen autobus-linea berriak eta metro zein autobus maiztasunak hobetzeko neurriak; eragin ekonomiko eta soziala zein balizko ingurumen-kalteak; trafikoaren, aparkalekuen eta sor daitekeen "segurtasun eza"-ren kudeaketa; errepideen eta horien mantentze-lanen kostea Aldundiak hartzea; eta anbulantziak.
Gaiei buruz eginda dauden azterketa-txostenak eskura ipintzea ere gura du plataformak. Halakorik egongo ez balitz, txosten independentea egitea eskatu du. Informazioaz gainera, prozesu parte-hartzaile bat bideratzea aldarrikatu dute, "ahal den heinean, herritarrokaz erabakiak hartu, eta ideiak eta ekarpenak jasotzeko".