Zapatuan, berriz, Ekaitz Elorduy berangoztarraren abereak izango dira eskualdeko ordezkariak. Eurekaz batera, honakoen idiak izango dira probalekuan: Laukizko Landazabalenak eta Laudioko Goirigolzarrirenak. Azken dema astelehenean jokatuko da, aurrekoak legez 21:00etan. Idi-proba nagusiak lau abere-bikote hartuko ditu. Abereak eroango dituzte honako jabeek: Erandioko Goierri auzoko Lopiortu, Muruetako Kamiñoko jatetxea, Bermeoko Aurrekoetxea anaiak, eta Mungiako Birle elkarteko Laski. Txapelketako irabazleak 1.500 euro eroango ditu.