Izan ere, Binakako Txapelketako ligaxka-fasearen lehenengo sailkatu biek gaur elkarren aurka jokatuko dute, hamargarren jardunaldian. Finalerdietara nor pasatuko den jakingura izango da nagusi Urdulizen. Aurretik aukera izango da ikusteko Promozio Txapelketako Agirre-Iturriaga eta Errandonea-Tolosa bikoteen arteko norgehiagoka, 22:00etan. Sarrerak 21:00etatik aurrera eros daitezke Iparraldeko leihatilan bertan; txartelak 30 euroan saltzen dira.
Partidak ETB1 kateak eta Eitb.eus atariak emango ditu, zuzenean; "ETB Kantxa" saioa Urduliztik egingo dute eta emanaldia Xabier Euzkitzek, Joxan Tolosak eta Xabier Anduezak gidatuko dute.
Gaur nagusituz gero, Danel Elezkanok eta Beñat Rezustak zortzigarren garaipena lortuko lukete, eta horrek matematikoki ziurtatuko lieke txartela; Jokin Altunak eta Julen Martijak osatutako bikoteak, berriz, sei partida irabazi ditu orain arte; hala, zazpigarren garaipena izan dezakete Iparralden. Dena den, lehen itzulian 22-13 irabazi ostean, bikoteak tantotan aldea ateratzen die Elezkanori eta Rezustari eta ziurra ez bada ere, oso zaila litzateke ez sailkatzea. Hala, gerta liteke bikote biek aurrera egitea, beste lehiakideek huts eginez gero.
Bikote biak sasoi-sasoian daude: Elezkano-Rezustak segidan irabazi dituzte azken bost partidak, Altuna-Martijak, aldiz, azken bostetatik hiru. Laurak izan ziren herenegun, eguaztenean, Urdulizen, materialak aukeratzeko. Elezkanok eta Rezustak hiru pilota hautatu zituzten, 105,8, 105,6 eta 106 gramokoak. Altuna III.ak eta Martijak, ordea, pisu apur bat gehiagoko larruak hartu zituzten, 106,2, 106,8 eta 106,5 gramokoak
Plentziako Udalaren sarrerak
Plentziako Udalak, azken urteotan egin legez, zozkatuko ditu partida ikusteko dituen sarrera biak. Interesdunek mezu bat bidali behar dute udala@plentzia.eus posta elektronikora, izen-abizenak eta telefono-zenbakia bertan ipiniz.